PERSONAL ug mainiton nga gi-abi-abi ni Provincial Treasurer Mr. Ronald Jame Violon ang mga bisita nga gikan sa Provincial Treasurer’s Office sa probinsya sa Lanao del Sur niadtong Pebrero 9 ning tuiga. Atol sa kalihokan, gipaambit ni Violon ang mga best practices nga gihimo sa ilang buhatan aron epektibo nga makolekta ang buhis gikan sa mga nagkadaiyang local sources. Pipila sa gihisgotan niini ang comparative income performance sa probinsya sa tuig 2024 ngadto sa 2025, pagmugna og mga treasury systems isip kabahin sa digitalization initiatives, paggamit sa social media platforms alang sa mga importanteng anunsyo uban pa. Samtang, giimbitahan usab sa buhatan ang GCash, usa ka Philippine mobile payments services sa Globe Fintech Innovations, Inc. nga nagtudlo kalabot sa digital payments alang sa mas paspas nga transaksyon hilabina sa pagbayad sa buhis.
Matud ni Lanao del Sur Asst. Provincial Treasurer Ms. Ma. Fe Alonto, napili nila ang probinsya gumikan ilang nakita nga usa ang Misor sa mga “growing provinces” nga adunay maayong pagdumala sa tax collection. Mapasalamaton si Alonto tungod kay daghan sila og natun-an labina sa gipaambit nga mga kahibalo kalabot sa insaktong pagdumala sa salapi ug buhis sa Kagamhanang Probinsyal.
Kasamtangan, padayon pa ang paningkamot sa buhatan ubos sa liderato ni Governor Juliette Uy aron mas maserbisyohan pa ang katawhan.
By: Jane Salimbao/PIO
Hulagway kuha ni: Marvin Gilig/PIO
