UBOS sa Barangay Empowerment Program sulod sa pamunuan ni Gobernador Bambi Emano kung asa gihatagan gahom ang tanang Barangay Kapitan sa matag barangay sa Misamis Oriental nga maoy magmugna og proposals sa mga proyekto nga magsiguro sa kaayohan sa ilang tagsa-tagsa ka ginsakopan.

Subay sa maong tinguha laing Canal ug Drainage System project ang natibawas sa Brgy. Natubo, Jasaan ubos sa pagdumala ni Brgy. Kapitan Hon. Francisco Longpiao, kung asa niadtong Oktubre 1, 2021 nahitabo ang pormal nga Inagurasyon sa maong proyekto.

Mokabat balor P300,000 nga dunay 245 meters ang katas-on sa Canal ug Drainage nga nahimutang partikular na sa Purok 2 sa nasangpit nga Barangay.

Duyog ang Barangay Infrastructure Projects nga buhatan ug sa paghingusog sa tanang Board Members sa hawanan sa Sangguniang Panlalawigan, nagsilbing sumbanan kini sa dalang kalipay nga nasinati sa mga lumulupyo sa maong barangay human nga nahaw-as sila sa kahasol sa wala pa ang gitanyag ang Canal ug Drainage.

Sila P-2 President Mr. Bernard Panjay ug si Brgy. Kag. Hon. Geraldine Cabeltes, duha ka buhing saksi sa benepisyong dala sa natibawas nga proyekto.

Sulti sa duruha nga tataw gayod ang nahimong kalahian niini kay matag bundak sa grabing ulan dili na molapaw ang tubig hinungdan sa pagbaha ug limpyo sab ang ilang kadalanan.

“Hapsay ug limpyo na ang mga karsada. Dako kaayo among pasalamat gyod ani og karon nagsilbi na ug nagamit na sa atong katawhan dinhi sa Purok,” testimonya ni Purok President Mr. Panjay.

“Ang tubig naa na gyod saktong agian, wala na sa dalan gaagi. Dako gyod ang among pasalamat,” dugang pamatuod ni Brgy. Kag. Hon. Cabeltes.

Misaksi sa maong kalihukan si BM Boboy Sabal uban ang pwersa sa BIP- MisOr nga dakong kabahin sa kalamposan sa nasangpit nga proyekto ug lakip gipasalamatan sa tibuok Brgy. Natubo sa lungsod sa Jasaan si Gobernador Bambi nga mitestimony nga tungod sa liderato niini dako na ang kalamboang naabtan sa ilang dapit.

Karong haduol na mahuman ang administrasyon ni Gobernador Bambi isip amahan sa lalawigan hingpit niining gipokusan ang kahumanan sa tanang proyekto nga ang tanang lungsod ug kabaranggayan sa Misamis Oriental siguradong maka-benepisyo ug walay mapihig aron mahatagab sa mga oportunidad sa pag-uswag.

(KUHA NI BENBOY BAGUIN/PIO)