GITUTOKAN karon sa Provincial Solid Waste Management Board (PSWMB) ang mga lugar nga dunay pagtaas sa fecal coliform ug reactive phosphate sa mga lungsod nga adunay Water Quality Management Area (WQMA) atol sa ilang 4th Quarter Meeting. Base sa presentasyon sa Department of Environment and Natural Resources – Environmental Management Bureau (DENR-EMB) Region 10, ang mga lugar nga dunay pagtaas gilangkuban sa Libertad, Naawan, Manticao, Opol, Tagoloan, Villanueva, Jasaan, ug Claveria.

Matod ni DENR-EMB 10 Chief Environmental Management Specialist Engr. Dovee Cherry Geollegue, usa sa mga rason sa pagtaas niini mao ang pagkalot sa kayutaan ug mga hugaw nga produkto sa agrikultura. Ang fecal coliform usa ka kagaw gikan sa tinae sa tao ug mananap nga posibleng makahatag og risgo sa katawhan. Samtang dunay negatibong epekto usab sa kinaiyahan ang kemikal nga reactive phosphate kung masobrahan kini, ug maka-apekto usab sa kalawasan.

Usa sa mga aksyon sa PSWMB ang pagmugna ug organisa og mga technical working group nga magtutok aron mahatagag kasolbaran ang maong mga problema. Mapasalamaton si Engr. Geollegue kang Governor Juliette Uy sa padayon niyang suporta kanila. Sapagka karon, wala pay natalang na-ospital tungod sa gamayng pagtaas sa fecal coliform ug reactive phosphate.

Kahinumdomang hugot ang pagpatuman ni Governor Uy sa pagsiguro sa pag-atiman sa kina-iyahan isip garbo ug makahatag usab og kaayohan sa katawhan sa lalawigan Gipahigayon ang 2025 4th Quarter PSWMB meeting niadtong Disyembre 16, 2025 sa Kapitolyo Probinsyal.

By: Nefilim Diaz/PIO

Hulagway kuha ni: Jezreel Ecuacion/PIO