REPACKING SA MGA RELIEF GOODS PADAYON SA KAPITOLYO PROBINSYAL

Posted: August 3, 2020

382020-6

Kasamtangan nga gipahigayon sulod sa buhatan sa Provincial Youth Development Office (PYDO) ang pagpang-repack sa nagkalain-laing mga relief goods nga nagsugod adlawng Lunes, Hulyo 27, 2020 hangtod Huwebes, Hulyo 30, 2020 . Ang pagpangrepack gilambigitan sa 32 ka personahe gikan sa 943rd Marine Company Reserve ug 73rd Naval Group Reserve.
Sumala ni Srgt. Angelica A. Carpio, ang Admin Non-Commissioned Officer in charge sa 943rd Marine Company Reserve nga sila niresponde sa panawagan sa Provincial Disaster Risk Reduction Management Office (PDRRMO) aron sa pakigtambayayong sa pagpang-repack sa mga relief goods aron adunay deretsong mahatag panahon emerhensya ug niadtong kinahanglan mga matagaan.
Dugang ni Srgt. Carpio nga dako iyang pasalamat kang Governor Bambi Emano sa kanunay niini nga pag-imbita kanila sa pag tabang sa pagpang-repack og relief goods kon diin kini na ang ikatulong hugna karong tuiga nga naimbitahan sila sa repacking.
Gipasabot sab niini nga ang kalihokan nga ubos sa mandato ni Governor Bambi dako og tabang dili lang sa mga nanginahanglan sa relief goods apan ngadto kanila mga personahe sa militar kay usa kini sa mga pamaagi nga mapakita nila nga ang militar ug ang lokal nga kagamhanan sa probinsya katambayayong sa pagtubag ug pagtabang sa katawhan sa Misamis Oriental.