HUMAN sa kadugay nga paghulat, karon pa gyud natagaan ug klaro ug tinuoray nga pagtagad ang Farm-to-Market Road nga nagdugtong sa Barangay Gumaod, Claveria, Misamis Oriental ug Barangay Natubo, Jasaan, Misamis Oriental. Usa kini sa mga pinaka-prayoridad ni Governor Juliette Uy ang pagpaayo, ug pagpalambo sa mga kadalanan sa Misamis Oriental, labi na ang mga Farm-to-Market Roads nga gikinahanglan sa mga mag-uuma, negosyante, ug komunidad. Sa iyang liderato, klaro ang mando: encouraged ang tanang barangay nga muduol sa Kapitolyo aron dali matubag ang ilang panginahanglan, ug dili na magdugay ang proseso.

Sa interview kang Kagawad Ecasio Opon sa Barangay Gumaod, iyang gipamatuod nga sa administrasyon lang ni Governor Juliette Uy sila nakadawat ug tinuod nga aksyon. Ubay-ubay na ka dalan ang gi-ayo, gi-patambakan ug dako kaayo ang iyang pasalamat. “Karon ra gyud mi nabati nga apil mi sa prioridad,” matod pa niya. Andam na karon ang mga dalan nga mohatag mas sayon nga biyahe, mas paspas nga pagbaligya sa produkto, ug mas luwas nga paglihok sa katawhan.

Ang rehabilitasyon sa dalan dili lang proyekto; timaan kini nga padayon ang pag-uswag sa Misamis Oriental basta tinud-anay ang liderato ug klaro ang serbisyo. Kay kung ang dalan luwas ug limpyo, ang kaugmaon mas hayag ug mas diretsong maka-abot sa tanan.

By: Zyrus James Gelizon/PIO

Hulagway Kuha ni: Zyrus James Gelizon