NAGPADAYON ang gihimong roll-out activity sa Benteng Bigas, Meron na Program sa nagkadaiyang kabaranggayan sa probinsya aron mapadayon ang paghatag og baratong bugas ngadto sa katawhan. Moabot sa kapin kon kulang 50 mil (50,000) ka household kon panimalay ang nakabenepisyo sa programa sa nagkadaiyang barangay sa probinsya. Ang P20 Rice Project “Benteng Bigas, Meron Na” usa ka nasudnong lakang nga nagtumong sa pagbaligya og bugas sa kantidad 20 pesos matag kilo aron matabangan ang katawhan batok sa pagsaka sa presyo sa mga pamaliton.
Prayoridad nga benepisyaryo niini ang mga indigent families ug vulnerable sectors. Mapasalamaton si Arlene Quiño Navidad, 48 anyos, residente sa Brgy. Sta. Ana, Tagoloan tungod kay niabot na sa ilang barangay ang programa. Matud niya, dakong tabang kini hilabina sa mga anaa sa kalisod kay dili na sila kinahanglan mamiliti aron makapalit og baratong bugas. Magpadayon pa ang maong roll-out activity ngadto sa uban pang mga kabaranggayan sa probinsya isip kabahin sa tinguha sa gobernadora nga mas mapaduol sa komunidad ang serbisyo ug malikayan ang dugang gasto sa plete sa mga konsumante.
Kahinumduman, personal nga gibisita sa gobernadora ang nasyunal nga kagamhanan aron mapatuman ang maong programa sa lalawigan. Tumong niini nga mahimong tubag sa kasamtangang krisis nga gisagubang sa nasud karon pinaagi sa paghatag higayon nga makabaton og baratong bugas ang katawhan.
By: Jane Salimbao/PIO
Photo Courtesy to Provincial Agriculture Office
