GIPLASTAR sa buhatan sa Iskolar ko ng Bayan (IKNB) ang pag implementar sa ilang scholarship program sa umalabot nga pagbukas sa klase. Kini human nagkatigom sa ika-duhang higayon ang mga coordinator sa matag lungsod ug dakbayan sa lalawigan uban ang mga opisyales sa Kapitolyo. Gisiguro ni Provincial Governor’s Office (PGO) Chief-of-staff Eljure Quilang nga nakasumiti na ang mga coordinators sa mga qualified scholars aron mahan-ay ang implementasyon sa ilang allowances ug scholarship.
Matod ni Kyla Kim Macacando, usa sa mga Unity Grantee sa IKNB gikan sa Misamis Oriental Institute of Science and Technology (MOIST), dakog tabang kanila ang programa tungod kay maka-abag kini sa ilang pangadlaw-adlaw nga panginahanglanon.Una nang nagkatigom ang mga coordinators uban ang mga mayores ug bise mayores sa lalawigan aron mahisgutan ang direksyon sa implementasyon ug plastar sa IKNB scholarship program. Gipahigayon ang panagtigom sa Kapitolyo Probinsyal niadtong Mayo 20, 2026. Usa kini sa mga direktiba ni Governor Juliette Uy sa mga kadagkuan sa Kagamhanang Probinsyal nga mahatagag oportunidad ang kabataang adunay pangandoy nga makahuman sa pagskwela.
Subay kini sa iyang pagpatuman sa BANGON strategic agenda nga nagtinguhang mapalambo pa ang lalawigan labina ang sektor sa kabataan.
By: Nefilim Diaz/PIO
Hulagway kuha ni: Marvin Gilig/PIO
