GIPRESENTAR sa Xavier University ang Smart Waste-to-Energy for Enhanced Environmental Planning (SWEEP) sa Kagamhanang Probinsyal isip alternatibong solusyon sa solid waste sa Misamis Oriental. Matod ni Dr. Maria Theresa Cabaraban, Faculty Member sa XU Chemical Engineering Department, tinguha nilang matabangan ang problema sa basura gikan sa mga komunidad. Gidugang niya nga usa kini sa ilang mga solusyon nga dili manobra ang mga landfill. Giudang usab ni Dr. Cabaraban nga makahatag pud kini og dugang supply sa kuryente nga makatabang sa mga lugar nga adunay kakulangon sa supply niini.

Samtang gibutyag ni Provincial Planning and Development Officer Archimedes Lazaro ila kining itanyag kang Governor Juliette Uy, aron ma-implementar kini sa lalawigan, labina sa mga Misamis Oriental Provincial Hospital (MOPH). Gilauman ni Dr. Cabaraban and dugang kalamboan sa inisyal nga panagtagbo tungod kay makatabang kini sa mga komunidad sa lalawigan. Nagpadayag usab siya sa iyang pasalamat sa gobernadora tungod sa oportunidad nga mapresentar ang ilang proyekto.

Kauban sa XU ang University of the Southern Philippines (USTP), Mindanao State University – Iligan Institute of Technology (MSU-IIT), University of the Philippines – Los Baños (UP-LB), Del Monte, CEPALCO, MORESCO ug City Government of Cagayan de Oro sa pag implementar sa maong proyekto.

By: Nefilim Diaz/PIO

Hulagway kuha ni: Marvin Gilig/PIO