TAGOLOAN MAYOR, KASUHAN SA PAGBINASTOS UG PAMALIKAS

Posted: February 21, 2020

87036668_550842235526799_553754308181491712_o

POSIBLENG matantang sa iyang pangatungdanan ang mayor sa Tagoloan, Misamis Oriental, tungod sa gihimo niining “pagpanulong ug barangay hall; pagpanudlo’g empleyado sa gobyerno; pagpamalikas; ug pagpakaulaw sa empleyado sa gobyerno” sa may Barangay Sta. Ana ning bag-o. Matud sa Department of Interior and Local Government (DILG), dili maayo ang iyang gihimo isip amahan sa lungsod.

Matud ni DILG-Misamis Oriental Provincial Director Marisia Naybe, wala sa hustong pamatasan ang gipakita ni Mayor Enan Sabio sa dihang gisulong niini ang clerk sa Brgy. Sta. Ana ug dayon pakaulaw niini sigun sa nahipos nga ebidensiya sa iyang kaugalingong tawo sulod sa barangay hall.

“Kita baya ang amahan sa lungsod. Kung dunay nahimong salaud ang atong anak, diba atong ipatawag dayon istoryahan kung unsay iyang sala? Human ana, tambagan, dili sulongon,” matud ni Director Naybe.

Base sa Local Government Code of 1991 ug sa Civil Service Law, mag-atubang sa kasong “conduct unbecoming of a public official” ang nasangpit nga mayor tungod sa wala pagsunod sa hustong balaud, inay naghimo na hinuon og iskandalo nga daghang tawo pa gayud ang nakakita.

Isip mayor sa lungsod, mahimong kasuhan si Sabio una didto sa Sangguniang Panlalawigan isip maoy sampitanan sa tanang reklamo sa lokal nga pangagamhanan, mahimo na lang dayon hatagan sa kopya sa reklamo ang buhatan sa DILG-MisOr isip tigpatuman panahon sa pagtantang sa mayor sa iyang pangatungdanan.