USA ka tuig ubos sa pangatungdanan ni Gov. Juliette T. Uy malampusong gipadayag ngadto sa tibuok lalawigan. Kini pinaagi sa usa ka makasaysayanong The Governor’s Report sa gobernadora sa wala pa nahuman ang bulan sa Hulyo 2026. Bisan pa man sa daot nga panahon, wala kapugngi ang pagsaksi ug pagpaminaw sa mga kalamposan ug kadaogan nga gitanyag atol sa kalihukan. Gisugdan usab kini sa usa ka Holy Mass isip pagpasalamat sa kinatibuk-ang kasumaran sa unang tuig nga nanerbisyo ang inahan sa lalawigan.
“Sa isa ka tuig nga akong pagdumala, naningkamot kita nga atong nahatag ang tinuoray, epektibo, de-kalidad, ug walay hao siao nga serbisyo ug walay tacha sa kurapsyon. Bisan gubut ang kalibutan – dunay gyera, krimen, kagutom, ug mga lain-laing sakit nga nagpahasol sa atong seguridad. Apan dili kita magpa-apekto niining tanan. Ato hinoon tutukan ang kaayohan ug kasulbaran sa kahimtang sa atong probinsiya”, sulti ni Gov. Uy. Nakaangkla sa BANGON development agenda ang liderato ni Gov. Uy nga maoy repleksyon sa iyang gipanumpaang serbisyo ug nakab-ot pinaagi sa panaghiusa sa tanang naglambigit nga sektor.
Pipila niini kon highlights of accomplishments kada letra nga mao ang sa Barangay Empowerment & Strengthening — mokabat sa 960 milyones pesos balor ang infrastructure development projects nga nasugdan sulod sa mga kabaranggayann sama sa farm to market roads, multi-purpose buildings, water systems, school buildings ug uban pa. Kung asa naglakip niini ang construction of school buildings sa Balingasag, Medina, ug El Salvador City; Water system sa Balingasag ug Alubijid; ug uban pang mga proyekto.
Sa Appropriate Approach to Agriculture Development, gipatuman ang farm mechanization pinaagi sa pag-apod-apod sa mga tractors ug composting facilities ug paghingusog sa distribusyon sa abono, seeds, livestocks, ug fingerlings alang sa mga mag-uuma ug mangingisda. Sa Noble Health & Social Services Delivery — gihatagan prayoridad ang healthcare ug social services pinaagi sa pag-improve sa tanang provincial hospitals ug ang pagpang-apod-apod sa gikinahanglang kagamitan sama sa hospital beds, ECG machines, wheel chairs, ug uban pa.
Sa Good & Transparent Governance, miabot sa kapin PHP 282 million ang local collections sa probinsya sulod sa Enero hangtod Hunyo 2026 o nagpasabot sa 66.5% nga pagtaas kumpara sa susamang bulan sa miaging tuig. Sa Opportunity for All in Livelihood & Empowerment — misaka og 9.67% ang tourist arrivals sa tuig 2025 kung asa naghatag sa Php285.5 milyones nga indirect tourism income. Ug, sa Notable Programs for Youth Development gipalig-on ang suporta sa edukasyon, sports ug digital literacy pinaagi sa paghatag og mga incentives sa mga estudyanteng miuli og garbo sa Mis Or human midaog sa nagkadaiyang pagsangka sa paugnat sa kusog ug ang pag-apod-apod og sports equipment lakip na ang pagpa-improve sa mga sports facilities.
Samtang gitaho ni Gov. Uy lakip ang mga flagship projects nga maoy tutokan ubos sa iyang administrasyon agi’g legasiya niini. Usa niini ang improvement sa Pelaez Sports Center ug ang mga planong pagpatukod sa mga pasilidad sama sa multi-purpose building with commercial spaces, indoor sports, dormitory, function/conference halls; facelifting of grandstand; rehabilitation of the oval track; multi-purpose facility for swimming pool; pickle ball and tennis court; ug regional training center for archery lakip na ang planong pag- construct og 5000-seater multi-purpose atrium & theater. Dugang sulti ni Gov. Uy agi’g pag-awhag sa tanan nga padayunon ang espirito sa panaghiusa – “Duyugi ako sa atong plano ug implementasyon sa mga proyekto, aron makab-ot ug mamahimong progresibo pa ang atong probinsya. I respectfully call on our members of the Sangguniang Panlalawigan to help our administration. Let us be partners in advancing the programs and reforms that our people deserve, ensuring that our collective efforts become a source of progress. Dili man sayon ang dalan sa unahan, apan kung maghiusa kita, walay hagit nga dili nato mabuntog”.
Malipayon ang tibuok kagamhanang probinsyal ug nanghinaot gihapon nga bisan sa daghan pang sagubangong pagsulay magpabilin ang tiunay nga gugma aron mabuntog kini ug makab-ot ang hingpit nga kadaogan alang sa tanang Misamisnons.
By: Rejiann Ammor R. Maygay/PIO
Hulagway kuha ni: Andy Pacamalan/PIO
