PUNO sa sa kasadya ang unang adlaw sa pagbukas sa tinuig nga selebrasyon sa Misamis Oriental Province-wide Tourism Week nga dunay temang: Resilient Tourism in a New Normal”.

Kini nga kalihokan ginasaulog matag ika-tulo nga semana sa bulan sa Septiyembre nga magsugod sa Septiyembre 20 hangtud 24, ning tuig.

Adlaw nga Lunes, Septiyembre 20, 2021 atol sa ika-75 nga senemanang pagpakayab sa nasudnong bandila pormal nga gibuksan ang selebrasyon kon diin gipangandam og ayo sa tibuok Provincial Tourism Office pinaagi sa pangpangulo sa ulo niini nga si Provincial Tourism Officer Atty. Jeffrey Saclot ang mga kalihokan nga bisan limitado gumikan sa pandemya gipaniguro niini nga mahimong mabulokon ug masadya.

Samot nga nahimong mahinungdanon ang  kalihukan gumikan sa gipakitang suporta pinaagi sa pagtambong sa tanang Association of Tourism Officers of Misamis Oriental (ATOM) pinanguluhan ni ATOM President Mr. Geronimo Magua Lagbas ug ATOM Vice-President Mr. Kevin Christopher Paalam.

Anaa sab misalmot ang mga Provincial Board Members uban ni BM Syremae “Saysay” Emano isip Chairwoman sa Komitiba sa Turismo ug ang tanang Misamis Oriental Department Heads Association (MODHA).

Si Provincial Tourism Officer Atty. Saclot mihatag sa iyang mensahe nga mipunting sa kamahinungdanon sa pagsaulog niining Tourism Week nga bisan sa giatubang nga hagit ning panahona, pabiling nagmadasigon ug wala nahunong ang paghatod serbisyo ug pagpakita sa maanindot nga mga patigayon.

Tinguha niini nga mapaila ang lalawigan sa MisOr subay sa nag-unang damgo ni Gobernador Bambi nga sentro sa iyang administrasyon ang Turismo nga maoy flagship program sa iyang panggobyerno.

Lig-on ang tema ning tuig nga selebrasyon hinungdan gisaad sa tibouk pwersa sa Provincial Tourism nga dili mohunong sa pag implementar sa mga programa.

“We will not stop from implementing the Tourism programs of Governor Bambi Emano from the Provincial Government down to the municipal and city governments here in Misamis Oriental,” sulti ni Atty. Saclot.

Usa ka highlight sab sa commencement exercises nga nahimong emosyonal ang tanan hilabina si Gobernador Bambi Emano sa pagpakita sa usa ka AVP/video nga mibalik-lantaw sulod sa duol siyam ka tuig nga dagan sa Turismo ubos sa liderato sa Gobernador.

Gani gidayeg niini ang tibuok Provincial Tourism team, Provincial Board Members ug ATOM nga usa sa dako ug kinasing-kasing nga anguna sa pagkab-ot sa dili mabangbang nga mga kalamposan.

“This will be my last year. And every year it has been an honor and a privilege. The success of Tourism, not me; but it has always been, and was and will be because of all of you — Board Members, Atty. Jeff, the ATOM, and all the Mayors. When it has been a success already, what I can do is to continue supporting. To sum it all up; it is in the Bible: Faith, hope and love, and the greatest of them is love. I love you all Tourism family,” mensahe ni Gobernador Bambi.

Dungan sa kalihokan ang hugpong sa ATOM mihatag og token of appreciation ngadto kang Gobernador Bambi sa hugot nga suporta ug pinasahe nga pagpangulo kanila nga midala sa tibuok lalawigan ngadto na sa daghanang kalamposan ug halapad nga mga oportunidad alang sa tanang Misamisnon human kini ilado na dili lang sa nasud sa Pilipinas apan tibouk kalibutan.

Taliwala nga limitado ang kalihokan apan memorable ang nahitabong pagbukas niining 2021 MisOr Province-wide Tourism Week Celebration nga wala nagpalupig sa pandemya, gani nahimong katumanan sa pagsalmot ning new-normal nga paagi mao ang pag-promotar sa lalawigan via online ug pagpa contest via online nga maoy in kaayo karon panahona.

(HULAGWAY KUHA NI MARK PAREJA/PIO)