TOURISM DEPT SA MISOR, NANGANDAM NA

Posted: June 18, 2020

18062020-1

WALA pay makatag-an kung kanus-a mahuman ang state of health emergency ug krisis nga resulta sa hulga sa coronavirus disease 2019, apan karon pa lang, gibutyag ni Provincial Tourism Officer Atty. Jeffrey Saclot nga dinhi sa Misamis Oriental, nangandam na sila kanus-a man buksan pagbalik ang turismo sa lalawigan.
Kini ang gipaabot ni Atty. Saclot sa Tourism Congress of the Philippines sa ilang virtual Free Webinar (Website seminar) niadtong Biernes, Hunyo 5. Isa sa mga resource speaker ang abogadong tourism officer sa maong seminar nga nagtangag sa tema: “Northern MindanaoTourism: Balancing the New Normal”.
Gipaabot niini nga labing naapektuhan sa krisis ang industriya sa turismo sa tataw nga rason: kahadlok sa posibleng pagtakboy sa nasangpit nga killer disease.
Hinuon, matud ni Atty. Saclot, dili na kaayo sila maglisod sa subling pagpaila sa Misamis Oriental nga angayan suroyan sa turista, lokal man o langyaw, tungod kay ilado na kini ug rekomendado sa mga dagkung opisyal sa gobyerno, mga kandidata sa local ug national pageantries, ug daghan pang uban.
Lakip sa resource speakers sila si Department of Tourism – Region 10 Director Ms. Marie Elaine S. Unchuan; Engr. Elpidio M. Paras, President/CEO, Dahilayan Adventure Park ug Seven Seas Waterpark & Resort; Mr. Eduardo F. Pelaez, President, Cagayan de Oro Hotel & Restaurant Association (COHARA), ug President, Mapawa Nature Park; Mr. Jose Clemente III, President, Tourism congress of the Philippines/ President, Rajah tours Philippines.