GITUDLO sa Provincial Agriculture Office (PAGRO) ang programang Uma sa Balay (USB) sa Revitalized-Pulis sa Barangay (RPSB) unit sa Villanueva. Gipresentar ni PAGRO Consultant Perfecto “Jojo” Rom Jr sa kapulisan ang pagpananom sa luna sa ilang panimalay ug sa komunidad gamit ang teknolohiyang Container Gardening, Vertical Planting, ug Composting & Integrated Pest Management. Matod ni RSPB PCpl. Reginald Tuling, dakog tabang kini kanila ug sa ilang pamilya tungod kay makamugna sila og organikong abono ug talamnon sa tugkaran sa ilang mga balay.

Gidugang niya nga mapaabot usab kini nila sa mga komunidad nga ilang mahimong assignment. “Kung ang tao dili gutom, mag ubos ang krimenalidad” matod ni Perfecto Rom Jr atol sa iyang paghatag lecture sa kapulisan. Gipahigayon ang lecture sa Misamis Oriental Provincial Police Office sa lungsod sa Villanueva niadtong Hunyo 1, 2026. Ang USB usa sa mga programa ni Governor Juliette Uy nga naghatag og kasolbaran sa kakulangon sa pagkaon sa mga tagsa-tagsa nga pamilya sa Misamis Oriental. Kanunay usab ang pag implementar ni Governor Uy sa maong programa sa mga kalungsuran, ug ubang komunidad aron maabot ang tinguhang food security sa lalawigan.

Magpadayon pa ang pagpaabot sa PAGRO sa programang USB subay sa pagpatuman sa BANGON strategic agenda sa administrasyon ni Governor Uy.

By: Nefilim Diaz/PIO

Hulagway kuha ni: Marvin Gilig/PIO ug Karl Jaspe/PIO intern