UNANG COMMERCIAL FLIGHT SA MISOR, MITUGPA NA

Posted: June 22, 2020

22062020-5

MITUGPA na sa Laguindingan airport ang pinakaunang commercial flight dinhi sa Misamis Oriental niadtong Miyerkoles, Hunyo 3, 2020. Ang pasahero gilangkuban sa locally stranded individuals (LSIs) ug overseas Filipino workers (OFWs).
Matud ni Provincial Task Force for COVID-19 spokesperson Atty. Jeffrey Saclot, mikabat sa 140 ka LSIs ug OFWs ang sakay sa Cebu Pacific Flight 5J395, nga miagi pa’g hugot nga profiling ug health safety protocols aron sayon na lang dayon ang contact tracing kon ugaling magkaproblema ugma damlag. Si Atty. Saclot ug iyang grupo mismo nangunay sa nasangpit nga profiling.
Si “Maki”, taga Surigao City, stranded intawon sa Luzon human mag-lockdown ang lugar sulod sa duha ka bulan, hilabihan nga pasalamat sa tabang ni Gov. Bambi Emano, kinsa hugot nagmando nga atimanon gayud ang LSIs ug OFWs sa ilang pagdangat sa Misamis Oriental, gikan sa transportasyon, pagkaon ug temporaryong katulganan nga walay bisan piso ilang gasto.
Bisan pa kono nga dili sila lumad Misamisnon, apan wala magduhaduha og tubag sa ilang panginahanglan ang pamunuan ni Gov. Emano.
Si “Melisa”, lumad nga Tagoloanon, nagkanayon wala sila maglisod og pauli sa ilang barangay tungod wala sila pasagdi sa lokal nga pangagamhanan sa Misamis Oriental.