PAG-ABLI sa Tourism Week sa Misamis Oriental, Naglunsad sa Bag-ong Tagline: “Uniquely Mis.Or – Where Every Journey is Truly Unforgettable” MISAMIS ORIENTAL Gisugdan karong adlawa atol sa ika-12 Flag Raising Ceremony sa Kapitolyo Probinsyal ang Tourism Week 2025 uban sa paglansad sa bag-ong provincial tourism tagline nga nagdala sa mensahe nga ang matag biyahe sa Misamis Oriental kay usa ka kasinatian nga dili gayud malimtan.
Ang maong kalihokan gipangulohan ni Provincial Tourism OIC Cindy Obeñita, nga human sa walo ka tuig, kini ang unang higayon nga siya mismo ang nagdumala sa selebrasyon. Nagpasalamat usab siya sa mainiton nga suporta ug partisipasyon sa mga mayor sa matag lungsod sa Misamis Oriental, ilabina kang Governor Juliette Uy nga padayon nga naghatag ug prioridad sa turismo isip yawe sa kalamboan.
Mitambong usab sa kalihokan ang Misamis Oriental Hotels and Restaurant Association (MOHARA) nga gipangulohan ni Ms. Bjanesha M. Emphasis, Association of Tourism Officers of Misamis Oriental ubos sa liderato ni Mr. Geronimo “Mamong” Lagbas, ug si Region 10 Tourism Director Ms. Marie Elaine Salvaña Unchuan nga nagpakita sa tibuok-suporta alang sa probinsya.
Ang Tourism Week adunay lain-laing kalihokan sama sa:
Kinaham: A Food Expo sa Lunes
Pasundayag: Cultural Dance Contest sa Martes
Uban pa nga makapadani nga mga aktibidad nga nagpakita sa kalamboan ug kultural nga bahandi sa Misamis Oriental.
Sa iyang mensahe, si Governor Juliette Uy nanawagan sa katawhan sa Misamis Oriental nga manag-uban sa pagsaulog sa turismo, dili lamang isip industriya, apan ingon usab nga ang Panaghiusa dalan sa Kalambuan. Sa pagsugod sa bag-ong yugto sa turismo sa Misamis Oriental, nagtan-aw ang probinsya nga kini mahimong pultahan sa mas daghang oportunidad, mas kusog nga ekonomiya, ug mas lig-on nga pagkahiusa.
By: Zyrus James Gelizon/PIO
Hulagway kuha ni: Reshel Cadavero/PIO
