WALA kapugngi sa katalagman ang mga serbisyong gihatod sa kagamhanang probinsyal sa tibuok Misamis Oriental. Labina alang ngadto sa mga naapektuhan sa milabayng Typhoon Basyang. Dunay mga buhatan nga on standby kon anaa sa skeletal workforce alayon sa Memorandum Order GJTU No. 181-2026. Kini ang half day work suspension niadtong Pebrero 5, 2026. Nasundan usab kini og Memorandum Order GJTU No. 182-2026 kon extension of work suspension sa Enero 6, 2026.

Gilangkoban ang mga buhatan nga nangunay sa delivery of basic and health services, preparation ug igong monitoring lakip deployment sa tao ug mga ekipo mao ang Provincial Engineering, General Services, Health, Mis Or CareS, Disaster Risk Reduction and Management, Social Welfare and Development ug ENRO Task Force Quarry, lakip ang Misamis Oriental Provincial Hospitals. Samtang nagpaabot og mensahe atol sa 6th flag raising ceremony sa kapitolyo pagka- Pebrero 9, 2026 si Provincial Administrator Ruel Gayoso sa ngalan ni Gov. Juliette Uy bahin sa mabulukong preemptive ug responsive measures sa kagamhanang probinsyal uban ang tanang grupo, partner agencies ug volunteers nga nagtinabanga.

“Garbo nato nga naay provincial government diay nga kanunay naglantaw sa kaayohan sa katawhan. Adunay provincial government nga ilang maasahan panahon sa kalisdanan ug labaw sa tanan, panahon sa kalamidad. Isip mga mamumuo, adunay mga butang nga atong nahimo nga makaayo ug makapangalagad ug makahatag kaayohan sa atong katawhan,” sulti ni Gayoso. Kahinumdomang parte sa hinanaling aksyon mao ang pagpangtunol og relief goods ngadto sa LGUs Lugait, Manticao, El Salvador, Gingoog, Binuangan, Salay, Talisayan, Magsaysay, Kinoguitan, Sugbongcogon, Lagonglong, Balingasag ug Villanueva, lakip ngadto sa MOPH Initao ug Alubijid OWWA Hospital. Dugang pa, nagpadala og heavy equipment ngadto sa Lugait isip tabang tabang alang sa clearing operation human nakasinati ang nasangpit nga lungsod og pag-baha.

Labihan ang pasalamat sa tanang apektado ngadto sa inisyatiba nga gihimo sa kagamhanang probinsyal. Gipaabot usab sa mga local chief executives ug chiefs of hospitals ang ilang suporta ug kaikag nga mapaluyohan ang tinguha sa kasamtangang administrasyon. Ning kasamtangan sa Pebrero 9, 2026, ang mga pami-pamilya ug indibidwal nga nag- evacuate tungod sa milabayng Typhoon Basyang nakauli na sa ilang mga panimalay.

Panghinaot ni Gov. Uy ang daling pag- recover sa tanan ug ang pagpadumdom kanila nga anaa kanunay ang gobyerno muabag ug kadangpan usab sa tanang Misamisnons.

By: Rejiann Ammor R. Maygay/PIO
 
 

Hulagway kuha nila: Keen John Pacaldo & Andy Pacamalan/PIO, John Miko G. Amper/PIO Intern, & PGMO Offices