WATER FOUNTAIN, GITUNOL NI GOV. EMANO SA NMMC

Posted: April 23, 2020

93832636_589303645013991_1037101238954491904_n

ARON mas mahimong komportable ang atong mga frontliners sa Northern Mindanao Medical Center (NMMC) nga nahimutang sa dakbayan sa Cagayan de Oro, nagtunol og drinking fountain with water purifier si Gov. Bambi Emano niadtong Abril 15, 2020.

Gidawat ni NMMC chief of hospital Dr. Jose Chan ang pasilidad nga gidonar sa Kooler Industries. Malipayong gipaabot ni Gov. Emano nga gihimong tulay ang pangagamhanang lokal sa Misamis Oriental aron masiguro nga modangat gayud sa nasangpit nga tambalanan ang maong butang nga adunay UV LED water disinfection.

Matud ni Dr. Chan, dili na kinahanglan mogawas pa sa tambalanan ang doctor, nurses ug uban pang hospital workers aron mopalit sa bugnaw ug limpyo nga tubig mainom. Mosalud lang sila sa drinking fountain, hupay na ang ilang kauhaw.

Matud ni Mr. Rod Ratunil III, branch head sa Kooler Industries dinhi sa Cagayan de Oro, nagtuo sila nga makatabang ang drinking water fountain sa pakigbatok sa coronavirus disease 2019, maong gidunol nila kini sa NMMC. Ug, aron dili mopadulong bisan kinsa o bisan asa ang nasangpit nga butang, gipaagi kini kang Gov. Emano.