MIBISITA ang Early Childhood Care and Development Office (ECCD) sa lokal nga kagamhanan sa Zamboanga City sa Kapitolyo Probinsyal niadtong Mayo 26, 2026 alang sa ilang benchmarking activity. Matod ni Zamboanga City ECCD Division Chief Ronald Cervas, nakita nila nga nag-una ang Misamis Oriental sa pagtukod sa opisina sa ECCD. Gidugang niya nga aduna silay daghang makat-unan niini nga mahimo nilang maaplikar sa ilang kaugalingong buhatan.

Gitumbok niya nga usa sa iyang mga nakitang best practices sa PECCD ang paghatag og standard sa mga Child Development Centers (CDC), sama sa accreditation sa mga Child Development Workers (CDW). Pipila lamang sa tibuok nasod ang adunay natukod nga Provincial ECCD, diin lakip niini ang Misamis Oriental. Nahimong 2nd place usab ang PECCD sa Misamis Oriental sa Gawad Edukampyon 2025 sa nasod. Samtang, mainiton giabi-abi ni Governor Juliette Uy ang mga CDW sa Zamboanga City ug naghatag og hugot nga suporta kanila. Mapasalamaton si Cervas kang Governor Uy ug sa tibuok pwersa sa PECCD sa higayon nga gitugutan sila nga mobisita ug mahimong sumbanan ang Misamis Oriental sa pag-implementar sa mga programa sa ECCD.

Kahinumdomang prayoridad ni Governor Uy ang paghatag edukasyon sa mga kabatan-onan aron mas hayag ang ilang kaugmaon para sa kalamboan sa lalawigan.

By: Nefilim Diaz/PIO

Hulagway kuha ni: Marvin Gilig/PIO