HUGOT ang suporta ni Governor Juliette T. Uy sa pagpalambo sa natad sa turismo sa probinsya. Kini human mainitong giabi-abi niini pinaagi sa Provincial Tourism Office ang pag-abot sa onse (11) ka mga Korean Media Representatives gikan sa South Korea. Tumong niini nga mas mapaila ang mga maanindot nga tourist destinations sa probinsya pinaagi sa familiarization tour sulod sa upat ka adlaw.
Matud ni South Korean Travel Blogger/Influencer Ms. Crystal Lee, excited kini nga masinati ang lain-laing water activities sa rehiyon. Dugang ni Ms. Lee, handom niini nga maila ang rehiyon nga dapit-suroyanan ngadto sa mga susama niini nga travellers sa ilang nasud. Gipasalamatan usab niini ang tanang nagpaluyo sa maong kalihokan tungod sa pagdapit kanila nga makabisita sa rehiyon. Pipila sa mga bisitahon niini sa Misor ang Divine Mercy Shrine sa El Salvador City, Lohas Airport Hotel sa Laguindingan, La Cascada sa Claveria ug mga dapit sa Cagayan de Oro, Bukidnon ug Iligan City.
Lakip nga nag-welcome sila Department of Tourism-Region 10 Assistant Regional Director Decius L. Esmedalla ug Cagayan de Oro-Misamis Oriental Korean Association President Mr. Jinwook Lee. Kahibaloan, ang South Korean ang giilang usa sa top foreign visitors sa Northern Mindanao. Dako ang pagtuo ni Governor Uy nga pinaagi sa paghatag pagtagad sa turismo makatabang kini aron madugangan ang kinitaan sa katawhan samtang mapalambo ang ekonomiya sa probinsya.
By: Jane Salimbao/PIO
Hulagway kuha ni: Marvin Gilig/PIO
