GIDAGSA sa mga residente sa tagoloan ang gipahigayon nga State of the Province Address ni Governor Peter “Sr.Pedro” Unabia sa Tagoloan ning lalawigan. Sa iyang Mensahe gibutyag sa Gobernador ang tinguhang sa tuig 2028 mapakunhod ang kapobrehon sa lalawigan uban sa kolaborasyon sa mga lideres. Ubos sa Programang PMU-LEAP gitanyag sa gobernador nga aduna na siyay natabangan nga upat (4) ka negosyante sa nasangpit nga Lungsod. Kini mao ang Beltran Integrated Farm, Migz Black Rice Trading, Merly Fish Retailing ug Talisay-Drive Laundry Services.
Lakip nga gitanyag ni Unabia ang mga kalampusan sa sektor sa Agrikultura, Turismo, Panginabuhian, Edukasyon ug Imprastraktura. “Agrikultura ang usa sa Haligi sa kalambuan sa Ekonomiya sa Probinsya”, kini ang gibutyag sa Gobernador bahin sa Agrikultura. Tungod niini palapdan ang suporta sa aquaculture lakip produksiyon sa high-value crops ug farm mechanization.
Samtang sa natad sa turismo gitanyag niini ang mga plano sama sa pagpalapad sa Laguindingan airport, View Deck sa Claveria, Divine Mercy sa El Salvador, Zipline sa Talisayan ug ang Ziplines sa Lugait ug Initao, ug tourism access roads. Misalmot sa kalihokan sila si 2nd District Congressman Bambi Emano, Vice Governor Jigjag Pelaez, Provincial Board Members, First lady Erlinda Unabia, Municipal Officials ug mga Brgy. Kapitanes.
Kabahin kini sa tinguhang makubsan ang kalisod sa lalawigan subay sa SDPI Program ug kinatibuk-ang PAGLAUM Development Agenda sa Gobernador.
By: Ellen Mae Lahinao/PIO
Hulagway kuha ni: Jezreel Ecuacion/PIO