OPISYAL nang gi-inagurahan ang bag-ong gambalay sa Local Health Insurance Office (LHIO) nga nahimutang sa ground floor South Concourse, Limketkai Mall, Cagayan de Oro City. Kini gipangunahan nila PhilHealth Area Vice President for Mindanao Gregorio Rulloda, Philhealth 10 Regional Vice President Delio Aseron II, Provincial Board Member Princess Emano isip representante ni Governor Juliette Uy ug CDO City Administrator Roy Raagas. Matud ni RVP Aseron, ang maong gambalay magsilbing sulbad sa problema sa kagamay sa espasyo sa kaniadtong opisina sa 2nd floor Gateway.
Tumong niini nga makabaton og komportable ug luag nga opisina aron mas daghan pa ang maserbisyohan nga mga miyembro. Subay niini, gibutyag ni Aseron nga moabot sa kapin usa ka libo (1,000) hangtud sa dos mil (2,000) ka mga average walk-in clients matag adlaw ang ma-akomodar niini kompara kaniadto nga tres syentos (300) hangtud kinyentos (500) lamang. Gidugang ni Aseron nga laumang mas nindot, hapsay ug paspas ang serbisyo nga mapadangat sa mga kliyente.
Dako kini og tabang hilabina sa mga PhilHealth Members gikan sa mga lungsod sa Jasaan paingon Lugait ug dakbayan sa El Salvador ning lalawigan. Samtang, gibutyag usab ni Aseron nga dunay mga dugang pasilidad niini sama sa conference rooms alang sa mga in-house seminars, back rooms, breastfeeding areas ug uban pa. Pag-awhag ni Aseron nga mobisita sa ilang buhatan ug mipasalig nga andam moserbisyo sa matag mudangop nga mga miyembro.
Kahinumduman, prayoridad sa administrasyon ni Governor Uy ang sektor sa panglawas hinungdan nga mapasalamaton kini sa ahensya sa walay undang nga serbisyo niini alang sa katawhan.
By: Jane Salimbao/PIO
Hulagway kuha ni: Charm Andy Pacamalan/PIO