MALAMPUSONG giinaugurahan ang bag-ong Misamis Oriental Provincial Jail (MOPJ) sa Brgy. Kamelon, Initao ning lalawigan. Kini nga proyekto adunay kantidad nga dul-an noybe sientos milyones (894,599,999.92) pesos nga nahimutang sa lima (5) ka ektarya nga luna. Kini adunay pasilidad nga langkoban sa main building, lecture building, inter-faith building, family visiting building, kitchen building, powerhouse units, admin building, health facility building, personnel dormitory ug uban pang amenidad.
Matud ni Provincial Jail Warden Bahian muabot ang kapasidad niini ngadto sa dos mil (2,000) hangtud sa kwatro mil (4,000) kumpara sa daang provincial jail nga tres sientos (300) ka mga inmates lamang. Pinaagi sa proyekto masulbad ang suliran sa congestion sulod sa bilanggoan ug mahatagan og luag, plastar ug komportable nga dapit ang mga Persons Deprived of Liberty (PDL).
Kabahin kini sa tinguhang makubsan ang kalisod sa lalawigan subay sa SDPI Program ug sa PAGLAUM Development Agenda ni Governor Unabia sa letrang “U” kon Unified efforts for Health and Social Services Delivery.
By: Jane Salimbao/PIO
Hulagway kuha ni: Marvin Gilig/PIO