GIPASALIG sa Department of Environment and Natural Resources-Region 10 nga andam ang ilang ahensya sa pakigtimbayayong sa Panggamhanang Probinsyal alang sa pagpanalipod ug pagdumala sa kinaiyahan. Kini human mibisita ang ahensya sa sa buhatan ni Governor Juliette Uy aron hisgotan ang mga nag-unang suliran ug mga hagit sa kinaiyahan sa probinsya. Pipila sa gihisgotan ang pagsulbad sa mga isyu sa logging ug illegal mining. Lakip gihisgotan ang mga plano sa pag-amping sa mangrove ug coastal areas.

Gihisgotan usab sa gobernadora ang paghatag sulbad sa problema kalabot sa solid waste hilabina sa hospital waste sa mga balay-tambalanan. Usa usab sa gihisgotan ang dakong tinguha sa gobernadora nga mapanindot ang eco-tourism sites sa probinsya sama sa Initao-Libertad Protected Landscape and Seascape ug Mt. Balatukan sa Gingoog City. Lakip sa gihisgotan ang pagpadayun sa pagtanom sa mga kawayan samtang misugyot ang gobernadora nga magtanom og mga mga indigenous trees. Mitambong sa kalihokan sila si DENR-10 Assistant Regional Director for Technical Services Ronald D. Gadot, Sr., Mines and Geoscience Bureau Regional Director Rodante Felina, Environmental Management Bureau (EMB-X) Regional Director Reynaldo S. Digamo ug uban pa.

Suportado ni Governor Uy ang pagpalambo sa kinaiyahan tungod sa pagtuo nga makatabang kini og dako alang sa musunod nga henerasyon.

By: Jane Salimbao/PIO

Hulagway kuha ni: Marvin Gilig/PIO