USA ka moderno ug bag-ong paagi sa pagbayad ang gi-promotar karon sa Bangko Sentral ng Pilipinas alang sa probinsya. Kini ang highlight sa gihisgotan atol sa pagkortesiya sa ahensya sa buhatan ni Governor Juliette Uy. Atol sa pagbisita, gidasig sa ahensya nga mapahingusgan sa mga merkado ang Paleng-QR Ph Plus diin ang pagbayad himoon pinaagi sa digital gamit ang e-wallets sama sa GCash, Maya ug GrabPay, QR code payments ug uban pang cashless transactions.
Ang Paleng-QR Ph Plus usa ka joint program sa BSP ug Department of Interior and Local Government (DILG). Kini usa ka priority initiative ubos sa National Strategy for Financial Inclusion 2022-2028. Tinguha karon sa ahensya nga mapatuman kini sa tibuok probinsya aron makatipid sa oras ug kwarta ug alang sa paspas ug sayun nga transaksyon sa katilingban. Hugot usab ang suporta sa gobernadora niini ug andam nga makigtimbayayong alang sa umalabot nga implementasyon sa programa.
Samtang, mutabang ang BSP pinaagi sa paghatag og inputs aron makalikay sa scamming ang mga konsumante. Sa kanunay, andam si Governor Uy nga mudawat sa kabag-ohan pinaagi sa pag-uswag sa teknolohiya hilabina nga kini makabenepisyo sa kinabag-an.
By: Jane Salimbao/PIO
Hulagway kuha ni: Charm Andy Pacamalan/PIO