GIPADAYAG ni Governor Juliette Uy ang tinguha sa pagsuporta sa sektor sa turismo sa lalawigan. Kini maoy usa sa mga prayoridad sa iyang administrasyon. Duyog sa tinuoray nga pagserbisyo sa katawhan, iyang gibutyag ang importansya sa aksyon aron mapahimuslan ang potensyal sa turismo sa lalawigan. Gilauman nga pinaagi sa maong sektor mapalambo ang ekonomiya sa lalawigan ug mahataga’g dugang opurtunidad ang katawhan.
Usa sa mga lakang nga iyang gisugyot mao ang pag-establisar og mga charter flights pinaagi sa Laguindingan Airport. Kini aron mas mapadali ang pag-abot sa mga turista ug hugotnong mapromotar usab ang mga atraksyon sa Misamis Oriental. Lakip usab sa mga plano niini ang pagpaila sa mga lokal nga putahi o delicacies aron mahimo kining timailhan sa lalawigan.
Gisiguro usab ni Governor Juliette ang padayon nga selebrasyon sa Kuyamis Festival nga usa sa ginaatangang kalihukan matag tuig. Sa susamang rason nga mapalapdan ang domestic tourism. Dugang pa sa inahan sa lalawigan, pinaagi sa mas lig-on nga kooperasyon sa civil society groups ug pribadong sektor mas masiguro ang kalungtaran ug kalampusan sa mga programa sa turismo. Gihagit niini ang tanang sektor sa pagtinabangay alang sa kalambuan dili lamang sa turismo, apan sa tanang aspeto sama sa panginabuhian sa tanang Misamisnon.
Gisaad ni Gov. Uy nga ang iyang administrasyon mubarog sa prinsipyo sa transparensiya, panaghiusa, ug tinuoray nga pag-alagad sa katawhan.
By: Yvonne U. Pahapay/PIO Intern
Hulagway kuha ni: Jez Ecuacion/ PIO
