PANAGHIUSA ang tipik sa mensahe ni newly-elected Gov. Juliette T. Uy atol sa iyang inauguration ceremony sa kapitolyo probinsyal ning unang adlaw sa bulan sa Hulyo 2025. Gisugat sa katawhan ang bag-ong nahurar nga opisyal sa masigabong palakpakan dihang gitanyag niini ang nagkadaiyang programa nga hatagan og prayoridad. Dako ang pasalamat ni Gov. Uy sa nakab-ot nga kadaogan gikan sa milabayng eleksyon.

Usa sa gitumbok niini mao ang gikinahanglang paghingusog sa sektor sa maayong panlawas, panginabuhian, edukasyon ug turismo. Uban niini ang panghinaot nga magdala og kalamboan sa lalawigan. Giawhag usab niini ang tanan nga maghatod sa tinuoray nga serbisyo ug dili lantawon ang kolor sa pulitika. Kini sa iyang pagtoo nga pinaagi sa kahiusahan dunay lig-ong kusog ug tinuod nga kabag-ohan. Saad sa inahan sa lalawigan nga ihatag ang tiunay nga pag-alagad ubos sa iyang administrasyon labina ang mahaw-as sa kalisod ang katawhan.

Samtang gibuksan ang maong inauguration sa usa ka thanksgiving mass nga gipangulohan ni Msgr. Raul Ricachu sa St. Augustine Metropolitan Cathedral. Dunay ceremonial opening sa provincial capitol door duyog sa kasadya hatod sa mga kanta gikan sa Villanueva Chorale. Anaa sa maong kalihukan ang mga dinapit nga bisita nga gilangkoban sa Mayores ug LGU Officials, Regional Directors ug partner agencies dignitaries uban ang capitol department heads ug mga empleyado sa kapitolyo, ug uban pa.

By: Rejiann Ammor R. Maygay/PIO

Hulagway kuha ni: Jezreel Ecuacion/PIO