GIAWHAG ni Gov. Juliette T. Uy ang tanang empleyado sa kapitolyo probinsyal nga manarbaho sa tinuoray nga dunay pag-hunahuna sa kaayohan sa katawhan. Kini ang unod sa iyang mensahe atol sa ikaduhang flag raising ceremony human gilakbitan ang financial status sa kapitolyo pinaagi nila ni Provincial Treasurer Ronald Jame Violon ug Provincial Accountant Philip Louie Dagoc.

Hisayrang ning kasamtangan dunay nahabiling utang gikan sa milabayng administrasyon sa kantidad nga Php934,905,056.47. Samtang ang unliquidated cash balances gikan sa active employees kay Php65 milyones. Buot gayod sa gobernadora nga dunay transparensiya sa iyang pagdumala. Sa susamang rason nga gitahasan ang tanang ulo sa departamento nga magpaabot sa ilang mga reports ug updates matag sinemanang pagpakayab.

Dugang ni Gov. Juliette nga angay hatagan prayoridad ang karakter ug kinaiya isip public servants ug dili nga maayo lamang sa kahibalo. Gitagaan niini og hibug-aton ang panaghiusa nga maoy dalan sa kalamposan. Tinguha gayod sa kasamtangang administrasyon nga masulbad ang gisagubang nga hagit kon mabayran ang mga utang uban sa pagsiguro nga mapatuman ang mga bililhong programa ug proyekto.

By: Rejiann Ammor R. Maygay/PIO

Hulagway kuha ni: Jezreel Ecuacion/PIO