GIBUTYAG ni Governor Juliette T. Uy nga andam kini magpadayun sa pipila sa mga programa sa lalawigan. Kini ang usa sa gihisgotan sa gobernadora atol sa gipahigayong inaugural address niini isip bag-ong lider sa probinsya. Matud ni Governor Uy, usa sa padayunon niini ang scholarship program sa lalawigan nga Iskolar Ko Ng Bayan (IKNB) ug giawhag nga muadto lamang sa iyang opisina tungod kay anaa pa kini pondo alang niini. Magdugang usab kini og suporta pinaagi sa livelihood programs ngadto sa mga anak nga wala nay ikagasto ang ginikanan sa pagpatungha sa kolehiyo.
Apan giklaro sa gobernadora nga limitado gihapon ang pagdawat niini tungod kay dili makaya kung managhan ang mga aplikante. Samtang, padayunon usab ni Governor Uy ang pagpahigayon sa Kuyamis Festival tungod sa kaabunda sa lubi sa lalawigan. Plano usab niini nga padayunon ang pag-apod-apod sa mga ayuda sama sa Assistance to Individuals in Crisis Situation (AICS), Ayuda sa Kapos ang Kita (AKAP) ug uban pa.
Gipasalig sa gobernadora nga ang pagsuporta niya labaw pa niini tungod kay tinguha niya nga dili magsalig sa ayuda kondili maghatag og economic ug education oppurtunities alang sa mga labing nanginahanglan. Pag-awhag sa gobernador nga magkahiusa ang tanan alang sa gilaraw nga kalamboan ug pag-uswag sa kinabuhi sa katawhan.
Kahinumduman, si Governor Uy giilang ikaduhang babae nga gobernador sa Misamis Oriental.
By: Jane Salimbao/PIO
Hulagway kuha ni: Jez Ecuacion/PIO
