OPISYAL nang giablihan ang 95th Founding Anniversary ug 12th Kuyamis Festival sa lalawigan.Ubay-ubay nga mga kalihokan ang naka-han-ay nga gisugdan sa Santos nga Misa. Gitumbok ni Gov. Peter “Sr Pedro” Unabia ang kamahinongdanon sa pagkahimugso sa probinsiya ilabi na sa kultura nga angayang ipasigarbo sa katawhan. Miawhag ang gobernador nga suportahan ang mga kalihokan pinaagi sa kolaborasyon sa tanang opisyales ug mga naglambigit nga mga ahensya.
Gibutyag usab ni Provincial Tourism Committee Chairman BM Syremae Emano nga ang pagsaulog niini magdala og paglaum, pagtinabanga ug kinatibuk-ang paglambo. Gilusad usab ang bag-ong Misamis Oriental Tourism Jingle.
Dunay Festival Booth display sa capitol grounds ug available ang farmers market sulod sa usa ka semana. Samtang ang Miss Kuyamis Coronation Night sa Limketkai Atrium ug Festival Dance Competition ipahigayon sa El Salvador City.
Kabahin kini sa tinguhang makubsan ang kalisod sa lalawigan subay sa SDPI Program ug PAGLAUM development agenda ni Governor Unabia ubos sa letrang G kon Goal-oriented tourism development.
By: Rejiann Ammor R. Maygay/PIO
Hulagway kuha ni: Marvin Gilig/PIO