“I FEEL VERY SAFE HERE” matod ni Gukjenews Senior Reporter JeeHyun Yough. Matod ni Yough, gikinahanglang mapahibalo sa lokal nga kagamhanan ang ubang turista nga luwas sa kagubot ug malingaw sila sa Misamis Oriental.
Gidugang ni Yough nga daghang natural nga suroyanan ang lalawigan nga makapahatag og kapiskay sa panglawas ug huna-huna kumpara sa ubang lugar sa nasod. Ang Gukjenews News Agency usa ka international news outlet sa South Korea.
Samtang gibutyag ni South Korean Travel Blogger Crystal Minhye Lee, wala niya damha ang kahusay ug kalinaw sa lalawigan kumpara sa iyang mga gakadunggang negatibong hulagway sa Mindanao. Gikalipay ni Lee ang iyang pagsuroy sa lalawigan labina sa pagbisita sa Divine Mercy Shrine sa El Salvador City tungod sa pagkabalaan sa maong lugar. Gibutyag usab ni Lee nga iyang mapasigarbo ug marekomendar ang Misamis Oriental sa ubang Koreano nga bisitahon tungod sa pagkamalinawon ug puno sa natural nga mga suroyanan.
Ikaduhang adlaw kini sa pagsuroy sa mga media personalities gikan sa South Korea diin nagpahigayon sila og sea activities sa Lohas Aqua Resort sa Laguindingan ug pagbisita sa Divine Mercy Shrine. Gipangunahan kini nga kalihokan sa Provincial Tourism Office ug Department of Tourism. Gipadayon ni Governor Juliette Uy ang programa sa pag imbita sa maong mga Korean Media aron mapadayon ang pasundayag sa lalawigan sa mga foreign ug local tourist.
By: Nefilim Diaz/PIO
Hulagway kuha ni: Charm Andy Pacamalan/PIO
