PADAYONG gitutokan sa Local School Board (LSB) nga mapa-uswag ang sitwasyon sa reading comprehension sa mga bata sa Misamis Oriental. Matod ni Department of Education (DepEd) MisOr Reading Coordinator Gladys B. Banac nga nag ubos na ang kaso sa mga batang dili kabalo mobasa agi sa suportang gihatag sa Kagamhanang Probinsyal. Gitumbok ni Banac, mokabat sa singkwenta porsyento (50%) ang pag-ubos sa mga batang natalang kaso sugod sa paghatag programa sa gobernador bahin niini.

Matod ni Banac nga usa sa hagit sa mga magtutudlo ang pagkahibalo kung unsa ang gikinahanglang tun-an sa mga bata tungod sa lahi-lahi nga level sa ilang pagsabot. Samtang nanawagan si Banac sa mga ginikanan nga giyahan ang mga bata sa pagtuon tungod kay sa panimalay magsugod ang edukasyon. Kahinumdomang una nang gimando ni Governor Peter “Sr. Pedro” Unabia ang pag-hire sa mga reading teacher sa lalawigan.

Kabahin kini sa tinguhang makubsan ang kalisod sa lalawigan subay sa Single-Digit Poverty Incidence (SDPI) program ug PAGLAUM agenda sa letrang A – Aggressive Programs for Youth Welfare and Development.

By: Nefilim Diaz/PIO

Hulagway kuha ni: Charm Andy Pacamalan/PIO