GOV UNABIA: “KINAHANGLAN NGA PROACTIVE TA KARON”

“KINAHANGLAN nga proactive ta karon”- mao kini ang pag-awhag ni Gobernador Peter “Sr. Pedro” Unabia sa tigom sa Local School Board, Local Health Board, Provincial Committee Against Trafficking-Violence Against Women and Children (PCAT-VAWC) ug Provincial Council for the Protection of Children (PCPC) niadtong Enero 20, 2023.
Kini gumikan sa mga isyu nga giatubang karon sa probinsya sama sa teenage pregnancy, child labor, child abuse, mga kaso kalabot sa violence against women and children, pagsulbad sa kakulangon sa mga pasilidad sa tunghaan sa lalawigan ug pagpalambo sa kalidad nga serbisyo sa pag-atiman sa panglawas.
Tungod niini, gihagit sa gobernador ang mga miyembro sa nasangpit nga mga grupo nga magmugna og mga action plan aron makab-ot ang gitinguha nga kaayuhan sa tanang mulupyo sa lalawigan.
Atol sa maong tigom, giaprobahan na sab ang 300-Milyon pesos nga budget alang sa mga proyekto sa mga tunghaan sa lalawigan lakip na ang kasabotan paghatag og service vehicle sa mga magtutudlo.
Dakong tinguha sa gobernador karon ang paspas nga pagsulbad sa mga suliran ug nagtoo kini nga mahimong posible ang kalampusan kung ubanan sa paningkamot ug panaghiusa sa matag usa.

By: Jane Salimbao/PIO

Hulagway kuha ni: Marvin Gilig/PIO