GOV UNABIA MILATAG SA DUGANG PLANO PARA SA MGA MISAMISNON

ALANG sa kaayohan sa katawhang misamisnon, upat ka mga proyektong pangkalamboan ang gilatag ni Governor Peter “Sr. Pedro” Unabia atol sa Flag Raising sa unang adlaw ning semanaha, lunes Marso 6, 2023.
Kini may kalabotan sa pagpalapad sa serbisyo sa MISOR CARES, dugang ekipo sa ospital, bastante ug dekalidad nga tubig ug pagpalambo sa torismo.

Sa MISOR CARES buot sa Gobernador nga maghimo ug Memorandum of Agreement (MOA) tali sa mga Hospital Laboratories ug Drug Stores aron diha diha masusi ang sakit ug matunol gilayon ang tambal ngadto sa mga pasyente.
Iyang ehemplo ang Memorandum of Agreement sa Mercury Drug ug Polymedic Hospital didto sa Gingoog City nga malampusong napatuman.

Gilakbitan usab sa gobernador ang pagkompleto sa mga apparatus sa Gingoog City Hospital.
Samtang gibutyag ni Governor Unabia ang planong Provincial Integrated Water Resources Security and Sanitation Plan.
Nasayran sa gobernador gikan sa mga eksperto nga nagpositibo sa Pesticides ug Coliform Bacteria ang pipila sa mga tinubdan sa tubig lakip na ang ubang dapit sa kadagatan.

Gihingusgan usab ni Governor Unabia ang pagpalambo sa Torismo ilabe na sa lungsod sa Initao ug ang pagmuntar sa mga Street Lights gikan sa Villanueva ngadto sa Gingoog city.

By: Iran Mercado/PIO

Hulagway kuha ni: Jezreel Ecuacion/PIO