KAMPANYANG ‘CHIKITING LIGTAS’, GISUGDAN NA

GISUGDAN na sa Provincial Health Office kauban ang Department of Health ang libreng pagpamakuna sa mga bata batok polio, rubella, ug measles kon tigdas sa lungsod sa Jasaan bag-ohay pa lamang.
Ang maong kalihokan nahisubay sa nationwide nga programa sa DOH nga ‘Chikiting Ligtas’ nga nagtinguha nga malikay ang mga bata sa sakit ug mga komplikasyon gikan sa polio, measles ug rubella sa nag edad sa 0 hangtod 5 anyos. Personal nga mibisita sa lungsod sa Jasaan si DOH Assistant Secretary Dra. Beverly Lorraine Ho kinsa maoy usa sa mga nanguna sa pagbakuna sa mga bata.
Matod ni Dra. Elijah Mateo, Municipal Health Officer sa Jasaan, target sa DOH ug PHO nga matupokan sa bakuna ang tanang populasyon sa mga bata sa matag lungsod ug syudad sa Misamis Oriental ning bulan sa Mayo.
Gidugang ni Dra. Mateo nga importante kaayo ang maong bakuna aron malikayan ang outbreak sa mga nahisgutan nga sakit diin posibling ikamatay sa bata kung dili kini mabakunahan.
Samtang mapasalamaton usab si Jasaan Municipal Mayor Redentor Jardin nila DOH ASEC. Dra. Ho, mga kadagkuan sa PHO ug ni Governor Peter “Sr. Pedro” M. Unabia sa ilang hugot nga pagpatuman sa kaayohan sa panglawas hilabi na sa mga bata nga posibling mamahimong lideris sa sunod nga henerasyon.
Subay usab kini nga kalihokan sa PAGLAUM strategic direction sa gobernador nga nakalatid sa letrang U kon Unified Efforts for Healthcare and Social Services Delivery.

By: Nefilim Diaz/PIO

Hulagway kuha ni: Mark Anthony Pareja/PIO
#GovPUnabia #ChikitingLigtas