2.5 MILYONES GIKAN SA IKNB NADAWAT SA 351 KA MGA TINUN-AN

MOKABAT sa dos milyones kinyentos kuwarentay sais mil otso syentos dose punto trayntay otso (2, 546,812.38) pesos ang natunol na sa buhatan sa Iskolar ko ng Bayan (IKNB). Kini para sa 351 ka mga tinun-an ning lalawigan sulod sa tuig dos mil baynte dos (2022) hangtod dos mil baynte tres (2023).
Matod ni IKNB Opreations Division Chief Philip Narte mamahimong mudangop sa Kapitolyo Probinsyal ang mga kolehiyong tinun-an ning lalawigan aron mo-aplay sa maong programa.
Ang mga mosunod nga gabayan sa scholarship gilangkuban sa residente sa Misamis Oriental, college student, ug certificate of registration o statement of account sa ilang tunghaan. Gidugang ni Narte, tanang year level sa kolehiyo ang mamahimong mo-aplay sa programa.
Samtang ang mga gabayan aron magpabiling scholar sa IKNB mao ang pagmintinar sa gradong otsenta porsyento (80%) ug kanunay nga pag dangop sa mga katigoman sa maong buhatan.
Kahinumdoman, hugot ang suporta ni Governor Peter “Sr. Pedro” M. Unabia sa mga kabatan-onan nga nahisubay sa letrang A sa PAGLAUM strategic direction, ang Aggressive Programs for Youth Welfare and Development.

By: Nefilim Diaz/PIO