MAHIMO nang paspas ug dali ang pagpaabot sa mga tabang pinansyal ngadto sa balay-tambalanan sa probinsya.
Kini human gipirmahan ang Memorandum of Agreement ni Department of Social Welfare and Development (DSWD) Secretary Rex Gatchalian ug Gobernador Peter Unabia. Ang MOA may kalabotan kini sa programang Assistance to Individuals in Crisis Situation nga nagtumong pag-abag sa mga kabus sa ilang gastohanan medical sa mga provincial hospital.
Moabot sa 50 mil pesos ang mahimong madawatan sa matag pasyente hilabina niadtong walay kapasidad pagbayad sa hospital bill pinaagi sa guarantee letter sa DSWD designated social worker.
Matud ni DSWD Regional Director Ramel Jamen moabot sa 3-Milyones pesos ang inisyal nga pundo niini nga programa. Makabenepisyo niini ang walo ka mga ospital sa probinsya sa Talisayan, Manticao, Magsaysay, Initao, Claveria, Balingasag, Alubijid ug dakbayan sa Gingoog.
Nakalatid kini nga kalihokan sa PAGLAUM Development Agenda sa gobernador sa letrang “U” kon Unified Efforts for Health and Social Services Delivery.
