GISUGDAN na sa Department of Education Division of Misamis Oriental ang Brigada Eskwela sa probinsya. Kini isip pagpangandam sa pagsugod sa klase, nagsugod ang brigada eskwela niadtong Hunyo 9 hangtod Hunyo 13 ning tuig. Usa sa mga pagpangandam sa DepEd Misor sa mga tulunghaan ang pagpamintal sa mga classroom, pag pamutol sa mga kahoy, pagpanghinlo ug uban pa. Samtang alang sa pagpangandam sa mga magtutudlo, gipaubos sila sa mga seminars sa Child Protection, Information drive ug lain-laing pagbansay.

Ang mga magtutungha gipaagi usab sa Reading Camp agi’g pag-andam kanila sa pagsugod sa klasi. Matod ni DepEd Misor Senior Education Specialist Dr. Catherine Ann Balanay importante nga masiguro ang safety sa mga bata ug lakip na ang mga magtutudlo hinungdan nga gibisita niini ang mga tulunghaan sa probinsya. Nagturn-over na usab og mga Emergency Kits ug uban pang DRMM Supplies sa matag-classroom. Giklaro usab ni Dr. Balanay nga mubalor 205,000 ka mga expected enrollees ang mutunga sa pagsugod sa klasi sa Hunyo 16 ning tuig.

Dugang ni Dr. Balanay nga sinugdanan kini aron adunay hamugaway ug luwas nga lugar sa pagkat-on sa mga bata ug mahatod ang kalidad nga edukasyon. Mapasalamaton usab siya sa padayon nga pagsuporta sa kagamhanang probinsyal sa tanang plano sa DepEd Misor nga makapalambo sa sektor sa edukasyon.

Kabahin kini sa tinguhang makubsan ang kalisod sa lalawigan subay sa SDPI Program ug PAGLAUM Development Agenda sa gobernador sa letrang ‘A’ kon Aggressive Programs for Youth Welfare and Development.

By: Asthea Torrecampo/PIO

Photo courtesy: SOCMEB Misor/FB Page