GIPASALIG ni Governor Peter “Sr. Pedro” Unabia nga padayon kining musuporta ug motabang sa lungsod sa Claveria. Kini ang giluwatan sa gobernador atol sa gipahigayong State of the Province Address (SOPA) niini sa maong lungsod. Matud sa gobernador, padayon niining pahingusgan ang sektor sa agrikultura pinaagi sa pagsuporta sa mga mag-uuma sa lungsod. Laraw usab niini nga makigtimbayayong sa USTP-Claveria aron mapalambo pa ang natad sa pag-uma sa lungsod.

Gitaho usab sa gobernador nga moabot sa 16 ka mga MSMEs ang nahimong benepisyaryo ubos sa Provincial Microfinance Unit-Livelihood for Economic Recovery and Acceleration Program (PMU-LEAP). Samtang, moabot sa 78 ka mga infrastructure project ang napadangat sa mga kabaranggayan nga gilangkoban sa mga road concreting projects, water system, multi-purpose building, school building, covered courts, dugang pasilidad alang sa balay tambalanan ug uban pa.

Lakip nga gitaho sa gobernador ang uban pang mga proyekto nga napatuman sa lungsod alang sa sektor sa turismo, programa sa mga kabatan-onan, maayong panglawas ug uban pa. Kahinumduman, ang Claveria ang giilang agricultural municipality sa probinsya diin pag-uma ang nag-unang panginabuhian sa katawhan.

Kabahin kini sa tinguhang makubsan ang kalisod sa lalawigan subay sa SDPI Program ug sa kinatibuk-ang PAGLAUM Development Agenda ni Governor Peter Unabia.

Hulagway kuha ni: Charm Andy Pacamalan/PIO